Adroddiad corfforaethol

Amcanion Cydraddoldeb Asiantaeth y Swyddfa Brisio (VOA) (2025-2028)

Diweddarwyd 28 Ionawr 2025

1. Am y VOA

Mae Asiantaeth y Swyddfa Brisio (VOA) yn asiantaeth weithredol i Cyllid a Thollau EF (CThEF). Yr ydym yn cyflogi oddeutu 4,000 o bobl.

Ni yw arbenigwyr a chynghorwyr prisio eiddo’r sector cyhoeddus, gan ddarparu’r prisiadau sydd eu hangen i gefnogi trethiant a budd-daliadau lleol. Mae ein gwaith yn sail i ariannu gwasanaethau cyhoeddus hanfodol.

Mae’r gwaith a wnawn yn galluogi casglu tua £60 biliwn o refeniw mewn ardrethi annomestig (a elwir hefyd yn drethi busnes) a’r Dreth Gyngor yng Nghymru a Lloegr, sy’n helpu i ariannu gwasanaethau cyhoeddus hanfodol. Rydym hefyd yn helpu i bennu rhenti teg a lwfans tai a dderbynnir yn Lloegr, yn ogystal â gwneud gwaith prisio eiddo ar gyfer ystod o gleientiaid yn y sector cyhoeddus.

2. Cyd-destun – deddfwriaeth berthnasol

Fel corff cyhoeddus, o dan Ddyletswydd Cydraddoldeb y Sector Cyhoeddus yn Neddf Cydraddoldeb 2010, mae dyletswydd benodol ar y VOA i gyhoeddi un neu fwy o amcanion cydraddoldeb i gefnogi’r asiantaeth i gyflawni nodau’r ddyletswydd cydraddoldeb gyffredinol. Mae hyn yn ei gwneud yn ofynnol i’r VOA roi sylw dyledus i’r angen i:

• dileu gwahaniaethu, aflonyddu ac erledigaeth anghyfreithlon ac ymddygiad arall a waherddir gan y Ddeddf
• hyrwyddo cyfle cyfartal rhwng pobl sy’n rhannu nodwedd warchodedig a phobl sydd heb nodwedd o’r fath
• meithrin cysylltiadau da rhwng pobl sy’n rhannu nodwedd warchodedig a phobl sydd heb nodwedd o’r fath

Y nodweddion gwarchodedig sy’n cael eu hamddiffyn o dan y Ddeddf yw:

• oedran
• anabledd
• ailbennu rhywedd
• priodas a phartneriaeth sifil
• beichiogrwydd a mamolaeth
• hil
• crefydd neu gred
• rhyw
• cyfeiriadedd rhywiol

3. Ein dynesiad

Mae’r VOA wedi ymrwymo i hyrwyddo cyfle cyfartal i bawb. Mae rhoi sylw dyledus i ystyriaethau cydraddoldeb yn ein gwaith yn rhan annatod o weithio gyda’n cwsmeriaid a chefnogi ein gweithlu.

Mae’r amcanion hyn yn adlewyrchu blaenoriaethau Asiantaeth y Swyddfa Brisio ar amrywiaeth a chynhwysiant, ond nid ydynt mewn unrhyw ffordd yn cwmpasu ein holl ddyheadau. Yn y pen draw, ein dyhead yw darparu gwasanaeth sy’n wirioneddol hygyrch a defnyddiol i’n cwsmeriaid, tra ein bod hefyd yn gwneud y VOA yn le gwych i weithio i’n pobl. Rydym am wneud mwy na’r hyn y mae’n ofynnol yn gyfreithiol i ni ei wneud; ydym am fod yn eiriolwyr cadarnhaol dros hyrwyddo cydraddoldeb i bawb.

Fel cyflogwr, byddwn yn parhau i hyrwyddo cyfle cyfartal i sicrhau bod ein gweithlu’n cynrychioli’r cymunedau rydym yn eu gwasanaethu, a’n bod yn denu ac yn cadw staff talentog. Mae hyn yn mynd ymhellach na’r nodweddion gwarchodedig gan ein bod hefyd yn canolbwyntio ar wella symudedd cymdeithasol yn y VOA. Rydym yn adrodd ar y cynnydd rydym wedi’i wneud o ran Amrywiaeth, Cynhwysiant a Llesiant, yn ein Hadroddiad Blynyddol a’n Cyfrifon. Byddwn hefyd yn cyhoeddi gwybodaeth am amrywiaeth ein gweithlu yn y rhain.

Fel corff cyhoeddus, byddwn yn parhau i sicrhau bod pob cwsmer yn cael ei drin yn deg a’u bod wedi ymrwymo i sicrhau bod ein gwasanaethau mor hygyrch â phosibl i’r holl gwsmeriaid.

4. Ein Hamcanion Cydraddoldeb

Mae ein hamcanion mewn tri categori: 

1. Cynrychiadol
2. Cynhwysol
3. Dangos parch

i sicrhau cydraddoldeb ar gyfer ein cwsmeriaid a’n gweithlu.

1. Cynrychiadol

Cwsmer - Byddwn yn gwella ein dealltwriaeth o gwsmeriaid sydd â nodweddion gwarchodedig, er mwyn sicrhau ein bod yn nodi effaith newidiadau polisi a gwasanaethau ar ein cwsmeriaid.

Er mwyn llwyddo byddwn yn:

• adolygu ein data, gan barhau i werthuso ein dull o gasglu data nodweddion gwarchodedig ac archwilio ffynonellau data presennol/newydd. Bydd hyn yn helpu i gael gwell mewnwelediad i ystyriaethau cydraddoldeb cwsmeriaid ac effeithiau posibl ein penderfyniadau
• cynyddu a monitro cwblhau Asesiadau o’r Effaith ar Gydraddoldeb (EQIAs) ar gyfer yr holl benderfyniadau polisi, prosiectau neu newidiadau perthnasol sy’n effeithio ar ein cwsmeriaid â nodweddion gwarchodedig, gyda’r nod o ddangos cydymffurfiaeth bellach â Dyletswydd Cydraddoldeb y Sector Cyhoeddus (PSED)
• cryfhau ein llywodraethiant mewnol ac atebolrwydd ar gyfer prosiectau a gweithgarwch newid polisi i sicrhau eu bod yn cael Asesiadau o’r Effaith ar Gydraddoldeb (EQIAs)

Gweithlu - Byddwn yn adeiladu ac yn cynnal gweithlu amrywiol a chynhwysol, sy’n adlewyrchu’r holl gymunedau rydym yn eu gwasanaethu ar draws pob gradd, grŵp a rhanbarth.

Er mwyn llwyddo byddwn yn :

• cynyddu cyfran y cydweithwyr sy’n datgan eu nodweddion amrywiaeth yn wirfoddol yn ein system Adnoddau Dynol ar-lein i 85%, er mwyn galluogi dadansoddiad cydraddoldeb mwy cywir o brofiad a deilliannau gweithwyr
• cynyddu amrywiaeth ar ein lefelau uchaf, a fesurir drwy gyfraddau cynrychiolaeth o ran menywod, lleiafrifoedd ethnig ac anabl, a chydweithwyr Du ac Asiaidd mewn rolau Gradd 7, Gradd 6 a rolau yn yr Uwch Wasanaeth Sifil
• sicrhau bod ein prosesau recriwtio yn seiliedig ar deilyngdod, wedi’u mesur gan ddadansoddiad cydraddoldeb o ganlyniadau penderfyniadau dethol.

2. Cynhwysol

Cwsmer - Byddwn yn cefnogi gwaith i sicrhau nad oes unrhyw gwsmeriaid dan anfantais wrth ddefnyddio ein gwasanaethau.

Er mwyn llwyddo byddwn yn:

• Gwella ein dealltwriaeth ganolog o’n darpariaeth addasiadau rhesymol, gan gynnwys cefnogaeth i’r rhai sydd wedi’u cau allan yn ddigidol.
• Adolygu, nodi rhwystrau, a gwneud argymhellion i gynyddu hygyrchedd gwasanaethau VOA.

Gweithlu - Byddwn yn sicrhau bod ein hamgylcheddau corfforol a digidol yn gynhwysol ac yn hygyrch, gan alluogi cydweithwyr i wneud eu gwaith gorau.

Er mwyn llwyddo byddwn yn:

• gwella cyfraddau boddhad cydweithwyr o ran pa mor hawdd a chyflym y darperir addasiadau yn y gweithle
• cau unrhyw fylchau sylweddol ym mhrofiad cydweithwyr o wahanol grwpiau, a fesurir gan gwestiynau ar thema ‘Triniaeth Gynhwysol a Theg’ yn Arolwg Pobl y Gwasanaeth Sifil
• cau unrhyw fylchau sylweddol yng nghyfraddau cadw cydweithwyr o wahanol grwpiau, a fesurir drwy ddadansoddi cydraddoldeb data unigolion sy’n gadael.

3. Dangos parch

Cwsmer - darparu i gydweithwyr ar draws y sefydliad yr offer a’r hyfforddiant sydd eu hangen i gefnogi eu dealltwriaeth o gyfrifoldebau’r VOA o dan Ddeddf Cydraddoldeb 2010 a Dyletswydd Cydraddoldeb y Sector Cyhoeddus (PSED).

Er mwyn llwyddo byddwn yn:

• parhau i gynnig hyfforddiant i gyfarwyddiaethau sy’n wynebu’r cwsmer i godi ymwybyddiaeth o Dyletswydd Cydraddoldeb y Sector Cyhoeddus (PSED), ein rhwymedigaethau cydraddoldeb ac addasiadau rhesymol. Byddwn yn monitro llwyddiant drwy dderbyn hyfforddiant, adborth cydweithiwr a monitro cwynion parhaus
• darparu adnoddau i gydweithwyr fel gweithdai a phecynnau cymorth, sy’n cael eu monitro a’u hadolygu gan adborth cydweithiwr.

Gweithlu - Byddwn yn darparu diwylliant teg a charedig a diwylliant dynol gydag ymdeimlad cryf o berthyn, ac amgylcheddau cymunedol lle rydym yn tyfu, ffynnu a dysgu.

Er mwyn llwyddo byddwn yn:

• Lleihau lefel y bwlio, aflonyddu a gwahaniaethu os yw nifer fach o gydweithwyr yn profi hyn.  Cynyddu lefel yr adrodd ar fwlio, aflonyddu a gwahaniaethu pan fydd yn digwydd a chytuno bod camau priodol wedi’u cymryd i fynd i’r afael ag ef, a mesur hyn drwy Arolwg Pobl y Gwasanaeth Sifil.
• Gwella sgoriau profiad cydweithiwr yn Arolwg Pobl y Gwasanaeth Sifil o ran gofal gwirioneddol a llesiant cydweithwyr mewn tîm.