Caffael yn Cofrestrfa Tir EF
Sut rydym yn defnyddio cyflenwyr allanol ar gyfer nwyddau a gwasanaethau.
Deddf Caffael 2023
Mae caffael cyhoeddus yn newid. Ar 24 Chwefror 2025, bydd y rheolau sy’n llywio sut mae cyrff cyhoeddus yn prynu nwyddau a gwasanaethau yn newid. Bydd Deddf Caffael 2023 yn gwella ac yn symleiddio’r ffordd caiff caffael ei wneud, a bydd o fudd i ddarpar gyflenwyr o bob maint, yn enwedig busnesau bach, busnesau newydd a mentrau cymdeithasol.
Os yw eich busnes yn cyflenwi nwyddau, gwaith neu wasanaethau i sefydliadau yn y sector cyhoeddus neu’r sector cyfleustodau – neu’n gobeithio gwneud hynny yn y dyfodol – mae angen ichi wybod am y newidiadau. Mae hyn yn cynnwys cyflenwi i Gofrestrfa Tir EF, adrannau eraill y llywodraeth, y GIG, awdurdodau lleol, prifysgolion, ysgolion, sefydliadau tai cymdeithasol, yr heddlu a brigadau tân a chwmnïau cyfleustodau.
Ceir canllawiau penodedig i’ch helpu i baratoi ac i’ch cefnogi wrth ichi ddechrau gwneud busnes o dan y drefn newydd – Canllaw byr i gyflenwyr (PDF, 360KB) ar brif elfennau Deddf Caffael 2023; taflen ffeithiau yn egluro sut bydd y Platfform Digidol Canolog (PDF, 4.8MB) yn gweithio, a fideos Supplier Knowledge Drops penodedig yn rhoi trosolwg ichi o’r newidiadau allweddol, gyda fersiynau ar gyfer Busnesau Bach a Chanolig eu Maint a Mentrau Cymdeithasol Cymunedol Gwirfoddol. Rydym wedi cyhoeddi Canllawiau Atodol (PDF, 629KB) hefyd, i esbonio sut rydym yn diffinio Busnesau Bach a Chanolig eu Maint, a gallwch weld ein Llawlyfr hyfforddi prynwyr yn y sector cyhoeddus i weld yr hyfforddiant manwl mae pob ymarferydd caffael yn ei wneud.
Sut mae delio â ni
Rydym yn hysbysebu ein contractau ar contracts finder lle y bo’n briodol.
Yn ogystal â llunio ein contractau ein hunain, rydym yn defnyddio contractau fframwaith a sefydlwyd gan adrannau eraill y llywodraeth sydd eisoes wedi bod trwy’r broses gystadlu a thendro. Rydym yn defnyddio cytundebau fframwaith Gwasanaethau Masnachol y Goron yn rheolaidd hefyd. Gwasanaethau Masnachol y Goron yw partner caffael cenedlaethol holl wasanaethau cyhoeddus y DU.
Cerdyn caffael y Llywodraeth
Mae cerdyn caffael y Llywodraeth (GPC) yn galluogi deiliaid i dalu am archebion heb fynd trwy’r broses archebu a thalu dwys traddodiadol.
Y GPC yw’r dull prynu a thalu a ffefrir gan Gofrestrfa Tir EF ar gyfer trafodion gwerth isel. Lle na ellir ei ddefnyddio, prosesir archebion prynu trwy ein system gwybodaeth busnes.
Cyfleoedd i fusnesau bach a chanolig (BBaCh)
Mae diffiniad y llywodraeth ar gyfer BBaCh yn nodi llai na 250 o staff, ynghyd â throthwyon mantolen neu drosiant. Darllenwch i weld a yw eich busnes yn gymwys fel BBaCh.
Mae Cofrestrfa Tir EF yn cydnabod pwysigrwydd BBaCh i economi’r DU a’r ystwythder ac arloesedd gallant eu cynnig wrth gyflenwi nwyddau a gwasanaethau. Trwy’r rhaglen Cymorth i Dyfu mae’r llywodraeth yn cefnogi busnesau i hybu cynhyrchiant, gyda hyfforddiant rheoli a meddalwedd newydd wedi eu profi i arwain at ganlyniadau.
- Mae Cymorth i Dyfu: Rheoli yn cynnig 90% o hyfforddiant arweinyddiaeth a rheolaeth a ariennir gan y llywodraeth mewn dros 50 o ysgolion busnes gorau’r byd yn y DU. Mae cyfranogwyr yn cael cymorth i ddatblygu cynllun gweithredu pwrpasol, yn cael cynnig mentora ac yn cael cyfle i rwydweithio ag arweinwyr busnes eraill.
Telerau ac amodau safonol
Mae Cofrestrfa Tir EF yn defnyddio amrywiaeth o wahanol fathau o gontractau yn dibynnu ar y llwybr i’r farchnad, gwerth a chymhlethdod y nwyddau a’r gwasanaethau a gaffaelir. Lle nad oes gan gyflenwr gontract gyda Chofrestrfa Tir EF, bydd telerau ac amodau’r archeb brynu ar gyfer nwyddau a gwasanaethau (PDF, 140 KB, 9 tudalen) yn gymwys.
Cysylltu
Cysylltwch â’n Pennaeth Masnachol gydag unrhyw ymholiadau ynghylch ein gweithdrefn gaffael.
Ebost: headofcommercial@landregistry.gov.uk
Head of Commercial
Trafalgar House
1 Bedford Park
Croydon
CR0 2AQ